Umhverfisdagar

Á hverju ári er í Kerhólsskóla ákveðinn fjöldi daga sem kallaðir eru umhverfisdagar. Þeir dagar eru tengdir ákveðnum atburðum í sveitarfélaginu, nýttir til vettvangsferða eða helgaðir skólalóðinni og ræktun.

Það er fastur liður í skólastarfinu að fara í réttir í Hólaréttum. Þangað fara bæði leik- og grunnskóladeild. Í haust fór grunnskóladeildin enn fremur í dagsferð að Úlfljótsvatni með viðkomu á Orkusýningu í Ljósafossstöð.

Í lok nóvember, ár hvert, er farið að Sólheimum í Grímsnesi þar sem nemendur í sjöunda bekk kynna vettvangsnám sitt. Þeir stunda vettvagnsnám á Sólheimum einu sinni í viku frá september til nóvember loka. Þar kynnast þeir íbúum Sólheima, heimsækja vinnustofur og kynnast sögu Sólheima.

Oft hefur verið uppskerudagur á haustin þar sem teknar hafa verið upp kartöflur en nú í haust var það gert í útinámstímum og gafst vel. Skógarferðir hafa líka verið vinsælar á haustin. Í desember fara elstu árgangar leikskóla ásamt nemendum úr tveimur yngstu árgöngum grunnskólans ávallt saman í skógræktina á Snæfoksstöðum og ná í jólatré fyrir jólball skólans.

Í apríl á hverju ári, um eða eftir Dag umhverfisins, hafa verið skipulagðir tveir umhverfisdagar. Þeir dagar hafa verið nýttir til þess að hirða um og laga aðstöðu á skólalóðinni sem er ákaflega fjölbreytt, skjólgóð og skemmtileg.

Á umhverfisdögum hefur verið smíðað útiskýli og bekkir, gert eldstæði, kurlaðir stígar, málað, grisjuð tré, tínt rusl, sópað, gróðursett, farið í ratleiki í nánasta umhverfi og aðra leiki þar sem samskipti, samvinna og upplifun eru stór þáttur.

25. nóvember 2016