Vordagar

Vordagar í Kerhólsskóla hafa verið með svipuðu sniði í nokkur ár.

Í leikskóladeildinni hefur skapast sú hefð að farið er í heimsókn á bæ í sveitarfélaginu og lömbin skoðuð. Hafa bændur skipst á að bjóða heim.  Annan dag er síðan haldin sumargleði leikskóladeildar á skólalóðinni sem foreldrafélagið stendur að. Í ágúst hefur svo eigandi dýragarðsins í Slakka í Laugarási boðið leikskólabörnunum í heimsókn.

Í grunnskóladeild eru tveir vordagar tileinkaðir ferðum. Annar dagurinn er oftast helgaður hreyfingu og farið í hjólaferð út frá skólanum og sund að henni lokinni. Það fer eftir lengd hjólreiðatúrsins og áfangastaðar hvort öll grunnskóladeildin fer saman eða er skipt í tvo hópa.

Seinni daginn er farið í ferðalag og hefur síðustu ár verið fylgt ákveðinni áætlun sem sett var fram í þróunarverkefninu Fjölbreyttir kennsluhættir í einstaklingsmiðaðri kennslu. Vettvangsferðum er þar skipt í ákveðin þemu sem tengjast sjó, sögu, náttúrufyrirbærum, menningu og orku.

Í þessari áætlun um vettvangsferðir var gert ráð fyrir að hver nemandi í grunnskóladeild færi í tvær útilegur að Þingvöllum á skólagöngu sinni. Þetta er tveggja daga útiskóli þar sem nemendur gista í tjöldum, skoða og upplifa náttúruna og vatnið, kynnast sögunni, ganga um staðinn og elda matinn. Fyrsta útilegan var farin haustið 2011 og er önnur útilega fyrirhuguð á vordögum 2017.

Þriðji vordagur grunnskóladeildar er sameiginlegur hjá báðum deildum. Það er skólaslitadagur grunnskóladeildar. Þá hefur skapast sú hefð að fara í Þrastarskóg. Þangað mæta að morgni allir árgangar Kerhólsskóla að undan skildum tveimur yngstu leikskólaárgöngunum og allir foreldrar sem tækifæri hafa. Foreldrafélagið sér um veitingar, spilaður er fótbolti og farið í leiki.

25. nóvember 2016